விக்கிரமாதித்தனும் வேதாளமும்

விக்ரமாதித்தனும் வேதாளமும்

சற்றும் மனந்தளராத 

விக்ரமாதித்தன் -

மீண்டும் வேதாளத்தை,

தொலைத்து விட்டிருந்தான்.

இலவச மிக்ஸி , டிவி

இன்னபிற உபகரணங்களோடு -

இருளடைந்த உலகத்தில்,

வேதாளத்தை தேடுவது 

கடினமாகவே இருந்தது!!.

கால் ஏறி களைத்திருந்த

விக்ரமாதித்தன் கண்களுக்கு,

பச்சை போர்டுகளுக்கு

பின்னுள்ள வேதாளம்

தெரிவதே இல்லை!!.

எரிபொருள் நிரப்பியே

ஏழையான விக்ரமாதித்தன்,

ஷேர் ஆட்டோக்களில் 

குலுங்கியபடி தேடுகிறான்-

சாலைக்குழி வேதாளங்களை!!.

நிலக்கரி வேதாளம் 

அகப்பட்ட மகிழ்ச்சியில்,

காய்கறி வேதாளம்

மறந்து போய்விட்டது,

விக்ரமாதித்தனுக்கு!!.

தான் கடவுளாய் வணங்கும்

கார்ப்பொரேட் வேதாளங்களே,

தன் காசு மதிப்பை

கக்கூஸ் காகிதமாக மாற்றுவது-

விக்ரமாதித்தனுக்கு தெரியவே தெரியாது!!

எப்போதும் சாதி வேதாளமும்,

அவ்வப்போது போதி வேதாளமும்,

மீதி வேதாளங்களை

விக்ரமாதித்தனிடமிருந்து

மறைத்து விடுகின்றன!!.

விக்ரமாதித்தனிடமிருக்கும்

ஒரு விரல் உடைவாளும்,

ஐந்து வருடத்திற்கொரு முறை

ஐநூறு ரூபாய்க்கு,

விலை போகிறது.

இருந்தாலும்,

சற்றும் மனந்தளராத

விக்ரமாதித்தன்-

தினமும் தேடுகிறான்,

தானே தன் முதுகிலேற்றிய

வேதாளத்தை.